Lyginni líkast

Ídolið okkar, Sigurður Líndal, kenndi okkur mastersnemum í dag í fyrsta sinn. Þá komst ég að því að hann var ekki einungis mannlegur heldur líka skemmtilegur. Jæja, allt í lagi með það. Eftir tíma þurfti ég að skreppa í Boringnes með smá viðkomu í Baulu. Þegar ég er að fara að keyra af stað frá Baulu sé ég hvar ídolið keyrir út á þjóðveg á undan mér. Ég spái svo sem ekkert meira í því og ek af stað. Eftir smá stund er ég komin alveg í rassgatið á honum (á ökumannamáli þið skiljið) en þar sem þetta var nú einu sinni Sigurður Líndal þá gat ég ekki fengið mig til að taka fram úr honum… svoleiðis gerir maður bara ekki sko! Ok, ég keyri þá bara á eftir honum alla leið niður í Boringnes – á misjafnlega miklum hraða. Hálfa leið niður í Boringnes sé ég að það er kominn bíll á eftir mér og greinilegt var að þolinmæðin var ekkert að drepa þann ökumann. En þrátt fyrir mörg tækifæri þó tók hann nú aldrei fram úr. Ég ákveð að standa við mína ákvörðun og taka ekki fram úr Sigurði Líndal þannig að þetta endar í þriggja bíla röð alla leið niður í Boringnes.   Jæja, þegar ég er að keyra inn í Boringnes og bíllinn fyrir aftan mig er að beygja út úr bænum þá lít ég í átt að bílstjóranum og sé að hann steytir hnefann í átt til mín grimmdarlegur á svip!! Þetta væri svo sem ekki frásögum færandi (segir maður svona Jónína??) nema fyrir það eitt að óþolinmóði bílstjórinn í bílnum fyrir aftan mig sem steytti hnefanum að mér var enginn annar en Sigurður Líndal sjálfur. Þið hljótið að sjá kaldhæðnina í þessu!!

Ok, þetta er haugalygi – ég keyrði reyndar á eftir Sigurði í dag og af endalausri virðingu gat ég ekki fengið mig til að taka fram úr – en þetta með hinn bílinn og steytta hnefann er bara lygi. Mér varð nefnilega hugsað til þess sem hann Sigurður Líndal sagði við okkur í dag um að líklega myndu blogg og tölvupóstar nútímans hafa sama gildi fyrir komandi kynslóðir og sendibréfin höfðu fyrir okkur, þ.e. heimildarlega séð. Þannig að við mættum nú aldeilis passa okkur hvað við segjum á blogginu – híhí… Ég hef nú lýst því yfir áður að ég sé helber lygari og bið ykkur um að lesa ekki bloggin mín með kreddubundinni oftrú (varð að koma þessu að). Mitt blogg er sem sagt svipað og annállinn góði fyrir tímabilið sem ekkert markvert gerðist og höfundurinn skáldaði bara upp snjóflóð og ofsaveður – þ.e. ber að taka með ákveðnum fyrirvara.

Góðar stundir