Til hamingju með afmælið Ester

(ESTER: ég vona að þú hafir ekki verið búin að kíkja 15 sinnum en tæknilegir örðugleikar (ég svaf út) ullu því að þetta blogg fer ekki í loftið fyrr en nú.)

Hmm… óður til afmælisbarnsins – tja, ég get í raun ekki rætt um neitt sem gerðist í gamla daga þar sem slíkt á heima þar (manstu samt þegar við tjölduðum úti á túni & þegar við þóttumst ætla að gista heima og mamma þín og pabbi náðu í okkur og svo framvegis og framvegis). Jamm, við vorum sem sagt bestu vinkonur hérna í denn, ég og Ester, einmitt á því skemmtilega tímabili sem kallast gelgjan 🙂 Síðan fór Ester á Krókinn í skóla og hvað gerist – júbb hún varð ólétt. Síðan flytur hún í Kópavog og hvað gerist þá – júbb aftur ólétt.  Þar sem Ester þykir mjög gaman að prjóna og hekla ákvað hún að þetta dyggði engan veginn og varð enn á ný ólétt. Og ef við teljum þetta saman þá eru þetta heil þrjú börn sem þessi kjarnakona hefur alið og geri aðrir betur (þ.e. nú á dögum)!!!

Ég held að Ester hafi skipt jafn oft um háskólanám og hún hefur átt börn. Bíddu nú við, hún byrjaði í kjarneðlisfræði, þótti það of létt, fór þá í stjörnugeimsfélagsverktæknifræði sem var líka og létt og endaði í heilafræði – og hefur nú vonandi fundið sína hillu í lífinu.

Samband mitt við Ester hefur nú ekki verið neitt gífurlegt síðan hún fór á Krókinn, en hún er sem betur fer ein af þessum gullmolum því það er alveg sama hvað það er langt síðan við hittumst – alltaf er eins og við töluðum síðast saman í gær (nema bara að í hvert skipti sem ég tala við hana er komið nýtt barn og hún búin að skipta um nám – en það er náttúrulega smáatriði hí hí).

Ég man enga skemmtilega sögu um þig Ester, þ.e. án þess að sverta mitt eigið nafn í leiðinni, og ætla þess vegna að láta það duga að birta þessa flottu mynd af þér og Dísu… Til hamingju með afmælið elsku vinkona, sálfræðinemi og ofurmamma með meiru!!!

skúri skúri

jebb, sérlega KB búið, og ég er NÚNA FYRST að jafna mig! note to self: ekki reykja á fillerí.

Annars var þetta svakalega gaman, og ef mælikvarðinn á gott partý er hvað mörg glös séu brotin án þess að gestgjafinn verði var við það, já þá var þetta bara ansi gott partý.

Ég kveið svakalega fyrir því að opna bloggið mitt því mig rámaði í það að ég hefði skrifað eitthvað um nóttina áður en ég fór að sofa (sbr. færsluna á undan) en sem betur fór var ég nú bara nokkuð nett á þessu, engin steitment og ekkert að setja út á einn eða neinn. Það var hins vegar miklu skemmtilegra að skoða svo það sem ég hafði verið að kommenta hjá vinum og vandamönnum. Spurði til dæmis Davíð bróðir hvort hann væri á lausu, lét Kollý vita að hún væri í kúadellu með bs-ritgerðina sína og svona. Lang skemmtilegasta kommentið er hins vegar hér á þessari síðu, sjá færsluna spurning og athugið sérstaklega tímasetningarnar.

Við allar bleikjur vil ég segja þetta:

TAKK FYRIR DÁSAMLEGT KVÖLD

Yfir og út frá dali hinna dauðu 😉